Local
සන්ධ්යා ගෙන් ලොක්කෙක් මිනී පෙට්ටියට සයිස් එක අසයි..
Published
10 months agoon
By
admin
මිනී පෙට්ටියක් සෑදීමට ශරීරයේ දිග, පළල අවශ්ය බව කියමින් විශ්රාමික බ්රිගේඩියර්වරයකු දුරකථන ඇමැතුමක් මඟින් තර්ජනය කළ බවට සන්ධ්යා එක්නැලිගොඩ මහත්මිය අපරාධයක වින්දිතයන් සහ සාක්ෂිකරුවන් ආරක්ෂා කිරීම සඳහා වූ ජාතික අධිකාරියට පැමිණිලි කර තිබේ.
මෙම ඇමැතුම හේතුවෙන් තමාගේ ජීවිතය අනාරක්ෂිත වී ඇතැයි පවසන සන්ධ්යා එක්නැලිගොඩ මහත්මිය කඩිනම් පරීක්ෂණයක් පවත්වා සාධාරණයක් ඉටුකරන ලෙසත් අවශ්ය ආරක්ෂාව ලබාදෙන ලෙසත් පැමිණිල්ලෙන් ඉල්ලා ඇත.
එසේම ඇය මෙම සිදුවීම සම්බන්ධයෙන් ජනාධිපති අනුර කුමාර දිසානායක මහතාට ලිපියක් මඟින් දැනුම්දී තිබේ. මාධ්යවේදී ප්රගීත් එක්නැලිගොඩ මහතාගේ අතුරුදන් වීමේ සිදුවීම සම්බන්ධයෙන් සාකච්ඡා කිරීමට අවස්ථාවක් ලබාදෙන ලෙසද එම ලිපිය මඟින් ඉල්ලා ඇත.
ජනවාරි 16 වැනිදා සවස 3.00ට පමණ නිර්නාමික ඇමැතුමක් මඟින් මෙම තර්ජනය එල්ල වූ බවත් පසුව කළ සොයා බැලීමකදී ඇමැතුම ලැබුණු දුරකථන අංකය ලියාපදිංචි කර නැතැයි අනාවරණය වූ බවත් සන්ධ්යා එක්නැලිගොඩ මහත්මිය පැවැසුවාය. වැඩිදුරටත් ඇය මෙසේද කීවාය.
“මිනී පෙට්ටියක් හදන්න මගෙන් දිග, පළල ඉල්ලුවාම එක වරම මම තිගැස්මකට ලක්වුණා. මේ පුද්ගලයා කියන්නේ මොකද්ද කියලා කල්පනා කළා. පෙට්ටියක් හදන්න මිනුම් ඉල්ලමින් ඔහු කියන දේවල් මම ටික වෙලාවක් අහගෙන හිටියා. මම හිතුවේ වඩුබාස් කෙනෙක්ගෙන් වැරැදිලා ආපු කෝල් එකක් කියලා. ඒ ගැන මම දිගින් දිගටම අහනකොට උඹේ දිග – පළල තමයි ඉල්ලුවෙ කිව්වා. මම ආපහු ඇහුවා මොකේ දිග, පළලද කියලා. උඹේ දිග, පළල දියන් උඹේ මිනී පෙට්ටිය හදන්න කියලා එම පුද්ගලයා කිව්වා. මට තර්ජනය කරමින් ආපු ඒ ඇමැතුමේ රෙකෝඩින් එක සාක්ෂියක් විදිහට පැමිණිල්ල කරද්දී භාර දුන්නා. කෝල් එක ආවේ රෙජිස්ටර් නැති අංකයකින් බව පසුව ආරංචි වුණා. ඒ විදිහේ රෙජිස්ටර් නැති දුරකථන අංක තවමත් භාවිත වෙනවා කියන්නේ රටේ ජනතාවගේ ජීවිතවලට ලොකු තර්ජනයක් එල්ල වෙලා. ඇමැතුම දුන් කෙනා කිව්වා ඔහු රිටයර් බිග්රේඩියර් කෙනෙක් කියලා. ලියාපදිංචි නැති දුරකථන අංක හමුදා සාමාජිකයන් භාවිත කරන්නේ කොහොමද කියන එක ගැටලුවක්.”
අමිත් මධුරංග ගමගේ
You may like
Local
අපි කියන මිලට වී නොගන්න මෝල් හිමියන් Black List කරනවා.. ලාල් කාන්ත
Published
4 months agoon
August 1, 2026By
admin
රජය නියම කර ඇති සහතික මිලට වී මිලදී ගැනීමට අපොහොසත් වන පෞද්ගලික මෝල් හිමියන් අසාදු ලේඛනගත කිරීමට පියවර ගන්නා බව කෘෂිකර්ම, පශු සම්පත්, ඉඩම් සහ වාරිමාර්ග අමාත්ය කේ.ඩී. ලාල් කාන්ත මහතා අවධාරණය කරයි.
අමාත්යවරයා මේ බව සඳහන් කළේ දෙහිඅත්තකණ්ඩිය මහවැලි සාලිකා ශාලාවේදී පැවැති ගොවි හමුවකට එක්වෙමිනි.
මෙහිදී වැඩිදුරටත් අදහස් දැක්වූ අමාත්යවරයා කියා සිටියේ, පෞද්ගලික අංශයට වී මිලදී ගැනීම සඳහා රජය මගින් සහනදායී ණය පහසුකම් ලබා දෙන්නේ රජයේ සහතික මිලට වී මිලදී ගැනීමේ කොන්දේසිය මත බවයි.
එසේ තිබියදී ඇතැම් මෝල් හිමියන් සහතික මිලට වඩා අඩු මිලට වී මිලදී ගන්නා බවට තොරතුරු වාර්තා වන බවත්, එවැනි පුද්ගලයන්ට ඉදිරියේදී රජය සමග ගනුදෙනු කිරීමට ඇති අවස්ථාවන් අහිමි කරන බවත් ඔහු පැවසීය.
රටේ කෘෂිකාර්මික ප්රතිපත්තියේ සිදුව ඇති වෙනස්කම් පිළිබඳව කරුණු දැක්වූ අමාත්යවරයා, මෙරට බඩඉරිඟු ගොවියා ආරක්ෂා කිරීම වෙනුවෙන් මේ වසරේ ආනයනය කිරීමට නියමිතව තිබූ බඩඉරිඟු මෙට්රික් ටොන් ලක්ෂ තුනක ප්රමාණය නතර කිරීමට රජය තීරණය කළ බව සඳහන් කළේය.
මේ හේතුවෙන් සත්ත්ව ආහාර නිෂ්පාදකයන් මුහුණ දී ඇති අමුද්රව්ය හිඟයට විසඳුමක් ලෙස, සහල් වෙනත් නිෂ්පාදන සඳහා අමුද්රව්යයක් ලෙස භාවිත කිරීමට පනවා තිබූ තහනම ඉවත් කළ බවද ඔහු අනාවරණය කළේය.
“සහල් වෙනත් නිෂ්පාදන සඳහා භාවිත කිරීම තහනම් කරමින් මීට පෙර නිකුත් කර තිබූ චක්රලේඛය අපි අහෝසි කළා. දැන් කිසිදු බාධාවකින් තොරව සත්ත්ව ආහාර හෝ වෙනත් නිෂ්පාදන සඳහා සහල් අමුද්රව්යයක් ලෙස භාවිත කරන්න පුළුවන්. එමගින් වී සඳහා පවතින ඉල්ලුම තවත් වැඩි වෙනවා,” යැයි අමාත්යවරයා පැවසීය.
එමෙන්ම පුරන් කුඹුරු අස්වැද්දීමේදී වී වගාවට පමණක් සීමා නොවී, බඩඉරිඟු වැනි අතිරේක බෝග වගා කිරීම කෙරෙහි අවධානය යොමු කළ යුතු බවත්, වී අලෙවි මණ්ඩලයේ ගබඩා ධාරිතාව ඉදිරි කන්නයේදී තවදුරටත් වැඩි කිරීමට සැලසුම් කර ඇති බවත් අමාත්ය ලාල් කාන්ත මහතා මෙහිදී වැඩිදුරටත් ප්රකාශ කළේය.
Local
ලෝක කුසලාන තරග බලන ක්රීඩා ලෝලීන්ට තහනම් භාණ්ඩ ලයිස්තුවක්..
Published
10 months agoon
February 7, 2026By
admin2026 T20 ලෝක කුසලාන ක්රිකට් තරගාවලිය වෙනුවෙන් කොළඹ නගරය කේන්ද්ර කරගනිමින් විශේෂ රථවාහන සැලැස්මක් සහ ආරක්ෂක වැඩපිළිවෙළක් ක්රියාත්මක කරන බව පොලිස් මාධ්ය කොට්ඨාසය නිවේදනය කරයි.
මෙම තරගාවලිය 2026 පෙබරවාරි මස 07 වන දින සිට මාර්තු 08 වන දින දක්වා පැවැත්වීමට නියමිත අතර, ශ්රී ලංකාවේ පැවැත්වෙන තරග කොළඹ ආර්. ප්රේමදාස ක්රීඩාංගනය සහ කුරුඳුවත්ත SSC ක්රීඩාංගනය කේන්ද්ර කරගනිමින් පැවැත්වේ. දේශීය හා විදේශීය ප්රේක්ෂකයින් විශාල පිරිසක් මෙම තරග නැරඹීමට පැමිණෙනු ඇතැයි අපේක්ෂා කරන බැවින්, තරග පැවැත්වෙන දිනයන්හිදී කොළඹ රථවාහන කොට්ඨාසය විසින් පහත පරිදි රථවාහන සැලැස්ම ක්රියාත්මක කරනු ලබයි.
ආර්. ප්රේමදාස ක්රීඩාංගනය ආශ්රිත රථවාහන සැලැස්ම
ආර්. ප්රේමදාස ක්රීඩාංගනයේ තරග පැවැත්වෙන දිනයන්හිදී වින්සන්ට් පෙරේරා මාවත (ග්රෑන්ඩ්පාස් පාර), බ්රීටෝ බබාපුල්ලේ පාලම හන්දිය, සෙබස්තියන් ඇළ පාර (මැල්වත්ත පාලම අසලින්), අඩි 100 පාර සහ සද්ධර්ම මාවත ඇතුළු මාර්ග කිහිපයක රථවාහන ගමනාගමනය අවස්ථානුකූලව සීමා කෙරෙනු ඇත.
විශේෂයෙන් පෙබරවාරි 08 (ශ්රී ලංකාව සහ අයර්ලන්තය), 15 (ඉන්දියාව සහ පාකිස්ථානය) සහ 19 (ශ්රී ලංකාව සහ සිම්බාබ්වේ) යන දිනවල පැවැත්වෙන තරග සඳහා විශේෂ රථවාහන සැලැස්මක් සහ ප්රවාහන සේවයක් ක්රියාත්මක වේ. මෙම දිනවල පැමිණෙන ප්රේක්ෂකයින් සඳහා පැරණි MOD රථගාල සහ පෝට්සිටි (Port City) රථගාලේ සිට ක්රීඩාංගනය දක්වා විශේෂ ප්රවාහන සේවයක් ක්රියාත්මක කිරීමට සැලසුම් කර ඇත.
එමෙන්ම පෙබරවාරි 11, 13, 21, 25 සහ 27 යන දිනවල පැවැත්වෙන තරග සඳහා ග්රෑන්ඩ්පාස් මැටිපාක්, සතොස, සෙබස්තියන් ඇළ, කෝවිල පාර සහ අඩි 100 පාර දෙපස රථගාල් පහසුකම් සපයා තිබේ.
SSC ක්රීඩාංගනය ආශ්රිත රථවාහන සැලැස්ම
SSC ක්රීඩාංගනයේ තරග පැවැත්වෙන පෙබරවාරි 07, 09, 10, 14 සහ 18 යන දිනවලදී රාජ්ය පරිපාලන හන්දිය, මෙට්ලන්ඩ් පෙදෙස සහ විද්යා මාවත ආශ්රිතව රථවාහන ගමනාගමනය සීමා කෙරේ.
මෙම තරග සඳහා පැමිණෙන රථවාහන ගාල් කිරීමට නිදහස් මාවත, පදනම් ආයතන මාවත, CR&FC, SSC ක්රීඩා සමාජ රථගාල, ක්රීඩා අමාත්යාංශයේ පරණ මැක්ඩොනල්ඩ් රථගාල, රූපවාහිනී රථගාල සහ BMICH පරිශ්රය වෙන් කර ඇත.
තරගාවලිය සඳහා පැමිණෙන ජනතාවගේ ආරක්ෂාව වෙනුවෙන් පොලිස් නිලධාරීන් 1500ක් සහ රථවාහන නිලධාරීන් 600ක් යොදවා ඇති බව පොලිසිය පවසයි. මීට අමතරව සිවිල් ඇඳුමින් සැරසුණු බුද්ධි අංශ නිලධාරීන් ද ආරක්ෂක කටයුතු සඳහා යොදවනු ලබයි.
විශාල ප්රමාණයේ ගමන් මලු, වීදුරු බෝතල්, ඩ්රෝන උපකරණ, මුවහත් පිහි, මත්ද්රව්ය සහ මත්පැන් ක්රීඩා භූමිය තුළට රැගෙන ඒම සපුරා තහනම් බව පොලිසිය මහජනතාවට දැඩිව අවධාරණය කරයි.



Local
ශ්රී ලංකාවෙන් තරුණියන් ආනයනය කර කොරියානුවන්ට විවාහ කර දිය යුතුයි.. කොරියා ආණ්ඩුකාර..
Published
10 months agoon
February 7, 2026By
admin
දකුණු කොරියාවේ ජින්ඩෝ ප්රාන්තයේ ආණ්ඩුකාර කිම් හී-සූ විසින් එරට පවතින ජනගහන පරිහානියට විසඳුමක් ලෙස ශ්රී ලංකාව සහ වියට්නාමය වැනි රටවලින් තරුණ කාන්තාවන් “ආනයනය” කළ යුතු බවට කළ මතභේදාත්මක ප්රකාශයක් සම්බන්ධයෙන් මේ වන විට දැඩි කතාබහක් සහ විවේචනයක් මතු වී තිබේ.
දකුණු ජොල්ලා ප්රාන්තයේ හේනම් සංස්කෘතික හා කලා මධ්යස්ථානයේ පැවති මහජන හමුවකදී ආණ්ඩුකාරවරයා මෙම ප්රකාශය සිදු කර ඇත. ක්වාන්ජු සහ දකුණු ජොල්ලා පරිපාලන ඒකක ඒකාබද්ධ කිරීමේ යෝජනාව සම්බන්ධයෙන් පැවති මෙම හමුවට දේශපාලන නායකයින්, විද්වතුන් සහ ප්රාදේශීය වැසියන් විශාල පිරිසක් සහභාගී වී සිටියහ.
සභාව අමතමින් කිම් හී-සූ පෙන්වා දුන්නේ දකුණු කොරියා ජනගහනය වඳවී යාමේ තර්ජනයට ලක්ව ඇති ප්රදේශ 89ක් හඳුනාගෙන ඇති බවත්, ඉන් සියයට 20ක්ම දකුණු ජොල්ලා ප්රාන්තයේ පිහිටා ඇති බවත්ය. 2000 වසරේ සිටම මෙම ජනගහන අර්බුදය පුරෝකථනය කර තිබුණද රජය හෝ විද්වතුන් ඒ සඳහා නිසි පියවර ගෙන නොමැති බවට ඔහු චෝදනා කළේය.
“අවසාන විසඳුම ලෙස හෝ අප ශ්රී ලංකාව හෝ වියට්නාමය වැනි රටවලින් තරුණ කාන්තාවන් ‘ආනයනය’ කර, ගම්බද ප්රදේශවල වෙසෙන අවිවාහක පුරුෂයන්ට විවාහ වීමට අවස්ථාව සලසා දිය යුතුයි. ඒ සඳහා විශේෂ ප්රතිපාදන සකස් කළ යුතුයි. මිනිසුන් නොමැති රටක කර්මාන්ත නගාසිටුවීමෙන් ඇති ඵලය කුමක්ද?”
මෙම ප්රකාශය යූ ටියුබ් (YouTube) නාලිකා ඔස්සේ සජීවීව විකාශය වූ අතර, එම අවස්ථාවේදීම පැනලිස්ට්වරයෙකු ලෙස සහභාගී වූ ක්වාන්ජු නගරාධිපති කන්ග් ගි-ජුන්ග් විසින් එම ප්රකාශය නුසුදුසු බව පවසමින් විරෝධය පළ කරනු ලැබීය.
ග්රාමීය සහ ධීවර ප්රජාව මුහුණ දෙන ජනගහන අවපාතය පිළිබඳ දැඩි අවධානයක් යොමු කිරීම ආණ්ඩුකාරවරයාගේ අරමුණ වන්නට ඇති බව සමහරු පවසතත්, ඔහු භාවිතා කළ වචන මාලාව දැඩි දෝෂදර්ශනයට ලක්ව ඇත.


