Local
රොෂාන් එලවීමෙන් ආණ්ඩුවේ අවසානය ඇරඹුනා.. විමල්..
Published
3 years agoon
By
adminඑදා ගෝඨාභය රාජපක්ෂ ජනාධිපතිවරයා තමාවත් උදය ගම්මන්පිල මහතාවත් ඇමති ධුරවලින් නෙරපාහැරීම, එම ආණ්ඩුවේ අවසානයේ ආරම්භය සනිටුහන් කළා සේම, රනිල් වික්රමසිංහ ජනාධිපතිවරයා රොෂාන් රණසිංහ මහතා ක්රීඩා අමාත්ය ධුරයෙන් නෙරපාහැරීම වත්මන් ආණ්ඩුවේ අවසානයේ ආරම්භය සනිටුහන් කරනු ඇතැයි උත්තර ලංකා සභාගයේ සභාපති, ජාතික නිදහස් පෙරමුණේ නායක, පාර්ලිමේන්තු මන්ත්රී විමල් වීරවංශ මහතා පෙන්වාදෙයි.
එසේම රොෂාන් රණසිංහ අමාත්යවරයා ධුරයෙන් නෙරපාහරිමින් රනිල් වික්රමසිංහ ජනාධිපතිවරයා පෙන්වූයේ වෙන කිසිවක් නොව තමන් “හොරු සමග හෙළුවෙන්” බව යැයි ද වීරවංශ මහතා මෙහිදී කීය.
පාර්ලිමේන්තුවේ පැවති කාරක සභා අවස්ථාවේ විවාදයට එක්වෙමින් ඒ මහතා මෙසේ අදහස් දැක්වීය.
එහිදී වැඩිදුරටත් අදහස් දැක්වූ වීරවංශ මහතා මෙසේද සඳහන් කළේය.
“රාජ්ය පරිපාලන අමාත්යාංශයේ වැය ශීර්ෂය විවාදයට ගැනෙන මේ අවස්ථාවේ ඊට පමණක් සීමා නොවී සමස්තයක් ලෙස මෙවර අයවැයේ බලපෑම පිළිබඳව කරුණු දැක්වීමට මා මේ අවස්ථාව යොදා ගන්නවා.
“රාජ්යය සහ ජනතාව අතර සම්මුතිය”
මීට ඉහතදී කරුණු දක්වපු රාජ්ය ඇමතිතුමන් පැවසුවා, ‘රාජ්යය සහ ජනතාව අතර පවතින සම්මුතිය කොතරම් දුරට ආරක්ෂා වෙනවාද? බලාත්මක වෙනවාද? කියන එක මත තමයි රාජ්ය පරිපාලනය ඇතුළු අනිකුත් සෑම අංශයකම පැවැත්ම හෝ විනාශය රඳා පවතින්නේ’ කියා. මේ වන විට ‘රාජ්යය සහ ජනතාව අතර පවතින සම්මුතිය ශක්තිමත් වෙමින් ද තිබෙන්නේ? දුර්වල වෙමින් ද තිබෙන්නේ?’ ඊයේ රොෂාන් රණසිංහ මන්ත්රීවරයා ක්රීඩා සහ වාරිමාර්ග අමාත්ය ධුරවලින් නෙරපාහැරියා. ඊට හේතුව තමයි ඔහු ඉතා නිවැරදිව, නිර්භයව ක්රිකට් ක්රීඩාවේ දූෂිතයන් පිළිබඳව ක්රියාමාර්ග ගැනීම.
කුණු කාණුව දිගේ බඩගාන්නෙ නැතිව…
වර්තමාන ජනාධිපතිවරයාගේ ඔළුවට ඔය ඔටුන්න වැටුණේ, තිබුණු පාලනය දූෂිතයි, කියලා ඇතමුන් කෑගහලා කියපු නිසයි; ‘ඒ දූෂිත පාලනය තමයි මේ ආර්ථික අර්බුදයට හේතුව’ කියලා කට්ටියක් මතයක් නිර්මාණය කළ නිසයි; ඒ දූෂිත පාලනය වෙනුවට අදූෂිත පාලනයක් ඇති කරන්න ‘අරගලයක්’ උත්පත්තිය ලබපු නිසයි. ඒ අරගලයේ පිහිටෙන් ‘කුණු කාණුව දිගේ බඩගාන්නෙ නැතිව’ වර්තමාන ජනාධිපතිවරයාගේ ඔළුවට ඉබේම ඔටුන්න පතිත වුණා. හැබැයි ඊයේ, ජනාධිපතිවරයා දූෂිතයන්ට එරෙහිව කතා කරන අමාත්යවරයාව එළියට දාලා, දූෂිතයන්ගේ පැත්තෙ හිටගනිමින් තමා කවුදැයි ඉතා මැනවින් පෙන්වා දුන්නා. ‘රාජ්යය සහ ජනතාව අතර තිබෙන සම්මුතිය’ මෙමගින් රැකෙනවා ද?
ආණ්ඩුවේ අවසානයේ ආරම්භය…
ගෝඨාභය රාජපක්ෂ ජනාධිපතිවරයා එදා මාවත් උදය ගම්මන්පිල මැතිතුමාවත් ඇමතිකම්වලින් එළියට දැම්මා. ඒක තමයි ඒ ආණ්ඩුවේ අවසානයේ ආරම්භය වුණේ; ‘රාජ්යය සහ ජනතාව අතර තිබෙන සම්මුතිය බිඳවැටීමට පටන් ගත්තේ. ඒ වගේම රාජ්යය සහ ජනතාව අතර සම්මුතිය බිඳවැටීමට පටන් ගනිමින්, මේ ආණ්ඩුවේ අවසානයේ ආරම්භය තමයි ඊයේ සනිටුහන් වුණේ. රොෂාන් රණසිංහ අමාත්යවරයා ධුරයෙන් නෙරපාහරිමින් රනිල් වික්රමසිංහ ජනාධිපතිවරයා පෙන්වූයේ වෙන කිසිවක් නොවෙයි තමන් ‘හොරු සමග හෙළුවෙන්’ කියලයි.
‘සදාචාරාත්මක වැහැරීම’
ඒ නිසා රාජ්ය අමාත්යතුමනි, ඔබතුමා දැනගන්න ඕනේ, ‘රාජ්යය සහ ජනතාව අතර සම්මුතිය බලවත් වන්නේ සදාචාරාත්මක වශයෙනුයි,’ කියලා. මතක තබාගන්න, සදාචාර විරෝධී ලෙස එම සම්මුතිය බලවත් වෙන්නෙ නැහැ. රාජ්ය පරිපාලනයේ සිටින නිලධාරීන්ට, රාජ්ය පරිපාලනය හා බැඳුණු වගකීම මනාව ඉටු කරන්න පුළුවන් වෙන්නේ රාජ්යය සහ ජනතාව අතර ඇති සම්මුතිය ශක්තිමත් වෙනවා නම් විතරයි. නමුත් හොරුන්ට විරුද්ධව සටන් කරපු ඇමතිවරයාව එළියට දාලා හොරුන් එක්ක හිටගන්නවා නම් එතැන තිබෙනවා ද සදාචාරාත්මක බලවත් වීමක්? එතැන තිබෙන්නේ සදාචාරාත්මක පිරිහීම. ගෝඨාභය රාජපක්ෂ ආණ්ඩුව, එදා අර්බුදයක් මැද හිටගෙන ‘මොකුත් නොදන්න තොත්ත බබෙක් වගේ’ යනකොට ඒකට විරුද්ධව අමාත්ය මණ්ඩලය ඇතුළේ කතා කරලා, ඇහුම්කන් නොදෙන කොට මේ තත්ත්වය රටට ඇහෙන්න කතා කළාම ඒකට උත්තරය අපව එළියට දමන එක නම් ඒක තමයි එදා සදාචාරාත්මක වැහැරීමේ ආරම්භය. ඒ වගේම ‘වර්තමාන රනිල් වික්රමසිංහ පාලනයත්’ ඒ සදාචාරාත්මක බලය අහිමි කර ගැනීමේ ආරම්භය ඊයේ සනිටුහන් කළ බව මම යළිත් අවධාරණය කරනවා.
ලක්ෂ 18කට විදුලිය අහිමි වෙයි!
රටවැසියාට පෙනෙන්න ඕනේ නැද්ද, ‘රාජ්යය විනිවිද පෙනෙන ආකාරයට කටයුතු කරනවා, කියලා. එතැනින් නේද මේ සම්මුතිය වඩවඩාත් බලවත් වෙන්නෙ? අද වෙමින් තිබෙන්නේ මේ සම්මුතිය බිඳවැටීම. මේ සම්මුතිය රැකෙන්න හැමදේම බලපානවා. දැන් බලන්න, අද වන විට පවුල් ලක්ෂ 6කට වැඩි ප්රමාණයකගේ විදුලිය කපලා. ඒ අයට මේ අධික විදුලි බිල ගෙවාගන්න බැහැ. ඒ විතරක් නොවෙයි තවත් ලක්ෂ 12කට ‘රතු බිල’ එවලා. ඒ ලක්ෂ 12 අතර පවුල් පමණක් නොවෙයි සුළු හා මධ්ය පරිමාණ කර්මාන්තකරුවනුත් ඉන්නවා. මේ විදිහට ගිහින් ඒ ලක්ෂ 12ගෙත් විදුලිය කැපුවාම විදුලිය අහිමි ඒකක ගණන ලක්ෂ දහඅටයි. මේක මෙතැනින් නතර වෙන්නෙත් නැහැ. ලබන අවුරුද්දේ සිට වැට් බද්ද සියයට 18ක් වෙනවා; මෙතෙක් වැට් බද්ද බලපාපු නැති ක්ෂේත්ර ගණනාවකට ඒක අදාළ කරනවා. තමුන්නාන්සේලා හිතන්නේ, ‘මේ ආර්ථික අර්බුදයෙන් ගැලවෙන්න අපේ සමාජය ගල් යුගයට ගෙන ගියාම හරියි’ කියලා ද? දැන් රාජ්ය සේවකයාට රුපියල් දසදහසකින් වැටුප වැඩි කළාම ඔක්කොම හරිද? නමුත් මේ පාලකයන් මේ රටේ හැම මිනිහෙක්ටම රුපියල් විසිදහසක පමණ බදු බරක් අලුතෙන් පනවලා තියෙනවා.
රනිල් යළි එන්නේ නැහැ!
මම නම් හූනා කිව්වා වගේ කියන්නම්, රනිල් වික්රමසිංහ මහත්තයා නම් ජනාධිපතිවරණයකට එන්නේ නැහැ. කවුරුහරි හිතනවානම් ‘එයා එයි’ කියලා, ‘අනේ පව්’ කියලා තමයි මට නම් කියන්න තියෙන්නේ. එතුමා කිසිසේත්ම ජනාධිපතිවරණයකට එන්නේ නැහැ වගේම ජාත්යන්තර ආයතනයක තනතුරක් අරගෙන ඉතුරු කාලයේ යෙහෙන් වැජඹෙන්න බලයි. ඒ හින්දා දැන් පඳුරකට ගැහැව්වත් ජනාධිපති අපේක්ෂකයෝ හැටක් විතර විසි වෙනවානේ. ඒක අතුරු කතාවක්.
රටේ ‘පාලන සුක්කානම’…
රනිල් වික්රමසිංහ මහත්තයා කොහොමහරි ජනාධිපති පුටුවට ගියාට එතැනින් එහාට එයාට වගකීමක් නැහැ. මේ ඉතිරි කෙටි කාලය තුළ ලබාගන්න පුළුවන් වාසිය සොයාගෙන යනවා මිසක් මේ කෙටි කාලය තුළ රටට සාධාරණයක් ඉටු කිරීමට ඔහුට උවමනා නැහැ. ඒ නිසා අද අපේ රටේ ‘පාලන සුක්කානම’ තිබෙන්නේ රටේ අනාගතය ගැන කිසිදු වගවීමක් නොදරන පුද්ගලයෙකු අතේයි. ඒ රාජ්ය පාලන සුක්කානම එතුමාට භාර දීලා, 69 ලක්ෂයේ ජනවරමින් බලයට ආපු අය, ‘දැන් බස් එක හොඳට යනවා’ කියලා හිතනවා.
‘කලහකාරී ප්රතික්රියා’
ඉදිරියේදී වැට් බද්දේ පරාසය පුළුල් කළාම තේ කර්මාන්තයටත් ඒක බලපානවා. දැනටත් සැලකිය යුතු සුළු හා මධ්ය පරිමාණ කර්මාන්ත ප්රමාණයක් වැසී ගොස් තිබෙනවා. ලබන අවුරුද්දේ එන අලුත් බදු සමග සමාජ ආතතිය තවතවත් වැඩි වෙනවා. සමාජ ආතතිය වැඩි වන විට රාජ්යය සහ ජනතාව අතර පවතින සම්මුතිය බිඳවැටෙනවා. මේ විදිහට සමාජ ආතතිය වැඩි වෙනකොට තමයි අනාගත පුරෝකතනයකින් තොරව කලහකාරී ප්රතික්රියා දැක්වීමට ජනතාව පෙළඹෙන්නේ. මේ අයවැයෙන් කරලා තියෙන්නේ රාජ්යය සහ ජනතාව අතර තියෙන සම්මුතිය වඩා යහපත් අතට හැරවීම නොවෙයි, එය ඉතාමත් නරක විදිහට බිඳවැට්ටවීමයි. මේ බිඳවැට්ටවීම මගින් සිදු වන්නේ රට අරාජිකත්වය කරා ගමන් කිරීමයි. අරාජිකත්වයෙන් ප්රයෝජන ගන්නේ වෙනවෙන පවිටු බලවේගයි. කිසිදු දුරදක්නා සොයාබැලීමකින් තොරවයි මේ ආණ්ඩුව අද කටයුතු කරන්නේ.
“මේකද උත්තරය?”
මම දැක්කා ජනාධිපතිවරයා එක්තරා දිස්ත්රික් සම්බන්ධීකරණ කමිටුවකට ගිහිල්ලා කියනවා, ‘ලබන අවුරුද්ද වෙනකොට අපට IMF තුන්වැනි ණය වාරිකය ලැබෙනවා. එතකොට අපේ බංකොලොත්කම නැති වෙනවා. ඊට පස්සේ අපිට ආයෙත් ණය ගැනීමේ පහසුකම ලැබෙනවා’ කියලා. ඒ කියන්නේ ආයෙත් අපි, ‘ණයට අරන්- සැපට කාලා – ජොලියෙ ඉන්නවා’ කියලයි; ඒ කියන්නේ, ‘මේ රට ආයෙත් පැරණි තකතීරු මාවතේම රැගෙන යනවා’ කියලයි. එහෙම ඉදිරියට ගියත් කෙටි කාලෙකින් මේ රට ආයෙත් ‘හොම්බෙන්’ යනවා. මේකද උත්තරය?
ණය වාරිකය ගෙවීමට සිදුවන විට…
දැන් බලන්න, ආජන්ටිනාව වැනි රටක් ඔය කියන මාවතේ ගිහින් දැන් දශක ගණනාවක් තිස්සේ ඉතා දරුණු ආර්ථික අර්බුදයක සිටිනවා. අපේ මේ පාලකයන් දැන් කියනවා, ‘අපි අර්බුදයෙන් එළියට එන්නයි හදන්නේ’ කියා. නමුත් ඉදිරියේදී ණය වාරිකය ලෙස අවුරුද්දකට ඩොලර් බිලියන තුනහතරක් ගෙවීමට සිදුවන විටයි අර්බුදය තීව්ර වෙන්නේ. ඉදිරියේදී ණය වාරිකය ගෙවීමට විදේශ විනිමය මදි වෙනකොට, කර්මාන්ත වැසී යනකොට, අපේ නිෂ්පාදනවලට අධික පිරිවැය නිසා ජාත්යන්තර වෙළෙඳපොළේ තරග කරන්න බැරි වෙනකොට මේ රට අන්ත අසරණ තත්ත්වයකට ඇද වැටෙනවා.
ඇවිලෙන ගින්නට ‘පිදුරු’
දිගුකාලීන කිරාමැන බැලීමකින් තොරව යන ගමනකින් මේ තිබෙන කිසිදු ප්රශ්නයකට පිළිතුරු ලැබෙන්නේ නැහැ. දැන් තමුන්නාන්සේලාට කියන්න පුළුවන්, ‘තෙල් පෝලිම් ඇතුළු පෝලිම් අපි නැති කළා’ කියලා. ඒ ‘පෝලිම්’ කිව්වේ අර්බුදයේ තීව්රතාව පෙන්නුම් කළ පින්තූරය. ඒ පින්තූරය නැති වුණා කියලා අර්බුදය නැති වෙලා නැහැ. අද හැම තත්පරයකදීම මේ රටේ මිනිස්සු මේ අර්බුදයේ ගොදුරු බවට පත්වෙනවා. මේ අර්බුදයෙන් එළියට එන මාවත නොවෙයි මේ පෙන්වලා තියෙන්නෙ. මේ අයවැය, ආර්ථික අර්බුදය නමැති ඇවිලෙන ගින්නට ‘පිදුරු දමන’ අයවැයක් මිස මේ ආර්ථික අර්බුදය නැමැති ඇවිලෙන ගින්නට ‘වතුර දමන’ අයවැයක් නොවෙයි. එහෙම අයවැයකින් රාජ්ය පරිපාලනයටවත් රාජ්ය සේවයටවත් රාජ්යය සහ ජනතාව අතර තියෙන සම්මුතියටවත් සාධාරණයක් ඉටු කිරීමට කිසිදු ලෙසකින් හැකි වන්නේ නැහැ, කියා අපි අවධාරණය කරනවා”
(අනුරුද්ධ බණ්ඩාර රණවාරණ)
මාධ්ය ලේකම්,
ජාතික නිදහස් පෙරමුණ
You may like
Local
අපි කියන මිලට වී නොගන්න මෝල් හිමියන් Black List කරනවා.. ලාල් කාන්ත
Published
4 months agoon
August 1, 2026By
admin
රජය නියම කර ඇති සහතික මිලට වී මිලදී ගැනීමට අපොහොසත් වන පෞද්ගලික මෝල් හිමියන් අසාදු ලේඛනගත කිරීමට පියවර ගන්නා බව කෘෂිකර්ම, පශු සම්පත්, ඉඩම් සහ වාරිමාර්ග අමාත්ය කේ.ඩී. ලාල් කාන්ත මහතා අවධාරණය කරයි.
අමාත්යවරයා මේ බව සඳහන් කළේ දෙහිඅත්තකණ්ඩිය මහවැලි සාලිකා ශාලාවේදී පැවැති ගොවි හමුවකට එක්වෙමිනි.
මෙහිදී වැඩිදුරටත් අදහස් දැක්වූ අමාත්යවරයා කියා සිටියේ, පෞද්ගලික අංශයට වී මිලදී ගැනීම සඳහා රජය මගින් සහනදායී ණය පහසුකම් ලබා දෙන්නේ රජයේ සහතික මිලට වී මිලදී ගැනීමේ කොන්දේසිය මත බවයි.
එසේ තිබියදී ඇතැම් මෝල් හිමියන් සහතික මිලට වඩා අඩු මිලට වී මිලදී ගන්නා බවට තොරතුරු වාර්තා වන බවත්, එවැනි පුද්ගලයන්ට ඉදිරියේදී රජය සමග ගනුදෙනු කිරීමට ඇති අවස්ථාවන් අහිමි කරන බවත් ඔහු පැවසීය.
රටේ කෘෂිකාර්මික ප්රතිපත්තියේ සිදුව ඇති වෙනස්කම් පිළිබඳව කරුණු දැක්වූ අමාත්යවරයා, මෙරට බඩඉරිඟු ගොවියා ආරක්ෂා කිරීම වෙනුවෙන් මේ වසරේ ආනයනය කිරීමට නියමිතව තිබූ බඩඉරිඟු මෙට්රික් ටොන් ලක්ෂ තුනක ප්රමාණය නතර කිරීමට රජය තීරණය කළ බව සඳහන් කළේය.
මේ හේතුවෙන් සත්ත්ව ආහාර නිෂ්පාදකයන් මුහුණ දී ඇති අමුද්රව්ය හිඟයට විසඳුමක් ලෙස, සහල් වෙනත් නිෂ්පාදන සඳහා අමුද්රව්යයක් ලෙස භාවිත කිරීමට පනවා තිබූ තහනම ඉවත් කළ බවද ඔහු අනාවරණය කළේය.
“සහල් වෙනත් නිෂ්පාදන සඳහා භාවිත කිරීම තහනම් කරමින් මීට පෙර නිකුත් කර තිබූ චක්රලේඛය අපි අහෝසි කළා. දැන් කිසිදු බාධාවකින් තොරව සත්ත්ව ආහාර හෝ වෙනත් නිෂ්පාදන සඳහා සහල් අමුද්රව්යයක් ලෙස භාවිත කරන්න පුළුවන්. එමගින් වී සඳහා පවතින ඉල්ලුම තවත් වැඩි වෙනවා,” යැයි අමාත්යවරයා පැවසීය.
එමෙන්ම පුරන් කුඹුරු අස්වැද්දීමේදී වී වගාවට පමණක් සීමා නොවී, බඩඉරිඟු වැනි අතිරේක බෝග වගා කිරීම කෙරෙහි අවධානය යොමු කළ යුතු බවත්, වී අලෙවි මණ්ඩලයේ ගබඩා ධාරිතාව ඉදිරි කන්නයේදී තවදුරටත් වැඩි කිරීමට සැලසුම් කර ඇති බවත් අමාත්ය ලාල් කාන්ත මහතා මෙහිදී වැඩිදුරටත් ප්රකාශ කළේය.
Local
ලෝක කුසලාන තරග බලන ක්රීඩා ලෝලීන්ට තහනම් භාණ්ඩ ලයිස්තුවක්..
Published
10 months agoon
February 7, 2026By
admin2026 T20 ලෝක කුසලාන ක්රිකට් තරගාවලිය වෙනුවෙන් කොළඹ නගරය කේන්ද්ර කරගනිමින් විශේෂ රථවාහන සැලැස්මක් සහ ආරක්ෂක වැඩපිළිවෙළක් ක්රියාත්මක කරන බව පොලිස් මාධ්ය කොට්ඨාසය නිවේදනය කරයි.
මෙම තරගාවලිය 2026 පෙබරවාරි මස 07 වන දින සිට මාර්තු 08 වන දින දක්වා පැවැත්වීමට නියමිත අතර, ශ්රී ලංකාවේ පැවැත්වෙන තරග කොළඹ ආර්. ප්රේමදාස ක්රීඩාංගනය සහ කුරුඳුවත්ත SSC ක්රීඩාංගනය කේන්ද්ර කරගනිමින් පැවැත්වේ. දේශීය හා විදේශීය ප්රේක්ෂකයින් විශාල පිරිසක් මෙම තරග නැරඹීමට පැමිණෙනු ඇතැයි අපේක්ෂා කරන බැවින්, තරග පැවැත්වෙන දිනයන්හිදී කොළඹ රථවාහන කොට්ඨාසය විසින් පහත පරිදි රථවාහන සැලැස්ම ක්රියාත්මක කරනු ලබයි.
ආර්. ප්රේමදාස ක්රීඩාංගනය ආශ්රිත රථවාහන සැලැස්ම
ආර්. ප්රේමදාස ක්රීඩාංගනයේ තරග පැවැත්වෙන දිනයන්හිදී වින්සන්ට් පෙරේරා මාවත (ග්රෑන්ඩ්පාස් පාර), බ්රීටෝ බබාපුල්ලේ පාලම හන්දිය, සෙබස්තියන් ඇළ පාර (මැල්වත්ත පාලම අසලින්), අඩි 100 පාර සහ සද්ධර්ම මාවත ඇතුළු මාර්ග කිහිපයක රථවාහන ගමනාගමනය අවස්ථානුකූලව සීමා කෙරෙනු ඇත.
විශේෂයෙන් පෙබරවාරි 08 (ශ්රී ලංකාව සහ අයර්ලන්තය), 15 (ඉන්දියාව සහ පාකිස්ථානය) සහ 19 (ශ්රී ලංකාව සහ සිම්බාබ්වේ) යන දිනවල පැවැත්වෙන තරග සඳහා විශේෂ රථවාහන සැලැස්මක් සහ ප්රවාහන සේවයක් ක්රියාත්මක වේ. මෙම දිනවල පැමිණෙන ප්රේක්ෂකයින් සඳහා පැරණි MOD රථගාල සහ පෝට්සිටි (Port City) රථගාලේ සිට ක්රීඩාංගනය දක්වා විශේෂ ප්රවාහන සේවයක් ක්රියාත්මක කිරීමට සැලසුම් කර ඇත.
එමෙන්ම පෙබරවාරි 11, 13, 21, 25 සහ 27 යන දිනවල පැවැත්වෙන තරග සඳහා ග්රෑන්ඩ්පාස් මැටිපාක්, සතොස, සෙබස්තියන් ඇළ, කෝවිල පාර සහ අඩි 100 පාර දෙපස රථගාල් පහසුකම් සපයා තිබේ.
SSC ක්රීඩාංගනය ආශ්රිත රථවාහන සැලැස්ම
SSC ක්රීඩාංගනයේ තරග පැවැත්වෙන පෙබරවාරි 07, 09, 10, 14 සහ 18 යන දිනවලදී රාජ්ය පරිපාලන හන්දිය, මෙට්ලන්ඩ් පෙදෙස සහ විද්යා මාවත ආශ්රිතව රථවාහන ගමනාගමනය සීමා කෙරේ.
මෙම තරග සඳහා පැමිණෙන රථවාහන ගාල් කිරීමට නිදහස් මාවත, පදනම් ආයතන මාවත, CR&FC, SSC ක්රීඩා සමාජ රථගාල, ක්රීඩා අමාත්යාංශයේ පරණ මැක්ඩොනල්ඩ් රථගාල, රූපවාහිනී රථගාල සහ BMICH පරිශ්රය වෙන් කර ඇත.
තරගාවලිය සඳහා පැමිණෙන ජනතාවගේ ආරක්ෂාව වෙනුවෙන් පොලිස් නිලධාරීන් 1500ක් සහ රථවාහන නිලධාරීන් 600ක් යොදවා ඇති බව පොලිසිය පවසයි. මීට අමතරව සිවිල් ඇඳුමින් සැරසුණු බුද්ධි අංශ නිලධාරීන් ද ආරක්ෂක කටයුතු සඳහා යොදවනු ලබයි.
විශාල ප්රමාණයේ ගමන් මලු, වීදුරු බෝතල්, ඩ්රෝන උපකරණ, මුවහත් පිහි, මත්ද්රව්ය සහ මත්පැන් ක්රීඩා භූමිය තුළට රැගෙන ඒම සපුරා තහනම් බව පොලිසිය මහජනතාවට දැඩිව අවධාරණය කරයි.



Local
ශ්රී ලංකාවෙන් තරුණියන් ආනයනය කර කොරියානුවන්ට විවාහ කර දිය යුතුයි.. කොරියා ආණ්ඩුකාර..
Published
10 months agoon
February 7, 2026By
admin
දකුණු කොරියාවේ ජින්ඩෝ ප්රාන්තයේ ආණ්ඩුකාර කිම් හී-සූ විසින් එරට පවතින ජනගහන පරිහානියට විසඳුමක් ලෙස ශ්රී ලංකාව සහ වියට්නාමය වැනි රටවලින් තරුණ කාන්තාවන් “ආනයනය” කළ යුතු බවට කළ මතභේදාත්මක ප්රකාශයක් සම්බන්ධයෙන් මේ වන විට දැඩි කතාබහක් සහ විවේචනයක් මතු වී තිබේ.
දකුණු ජොල්ලා ප්රාන්තයේ හේනම් සංස්කෘතික හා කලා මධ්යස්ථානයේ පැවති මහජන හමුවකදී ආණ්ඩුකාරවරයා මෙම ප්රකාශය සිදු කර ඇත. ක්වාන්ජු සහ දකුණු ජොල්ලා පරිපාලන ඒකක ඒකාබද්ධ කිරීමේ යෝජනාව සම්බන්ධයෙන් පැවති මෙම හමුවට දේශපාලන නායකයින්, විද්වතුන් සහ ප්රාදේශීය වැසියන් විශාල පිරිසක් සහභාගී වී සිටියහ.
සභාව අමතමින් කිම් හී-සූ පෙන්වා දුන්නේ දකුණු කොරියා ජනගහනය වඳවී යාමේ තර්ජනයට ලක්ව ඇති ප්රදේශ 89ක් හඳුනාගෙන ඇති බවත්, ඉන් සියයට 20ක්ම දකුණු ජොල්ලා ප්රාන්තයේ පිහිටා ඇති බවත්ය. 2000 වසරේ සිටම මෙම ජනගහන අර්බුදය පුරෝකථනය කර තිබුණද රජය හෝ විද්වතුන් ඒ සඳහා නිසි පියවර ගෙන නොමැති බවට ඔහු චෝදනා කළේය.
“අවසාන විසඳුම ලෙස හෝ අප ශ්රී ලංකාව හෝ වියට්නාමය වැනි රටවලින් තරුණ කාන්තාවන් ‘ආනයනය’ කර, ගම්බද ප්රදේශවල වෙසෙන අවිවාහක පුරුෂයන්ට විවාහ වීමට අවස්ථාව සලසා දිය යුතුයි. ඒ සඳහා විශේෂ ප්රතිපාදන සකස් කළ යුතුයි. මිනිසුන් නොමැති රටක කර්මාන්ත නගාසිටුවීමෙන් ඇති ඵලය කුමක්ද?”
මෙම ප්රකාශය යූ ටියුබ් (YouTube) නාලිකා ඔස්සේ සජීවීව විකාශය වූ අතර, එම අවස්ථාවේදීම පැනලිස්ට්වරයෙකු ලෙස සහභාගී වූ ක්වාන්ජු නගරාධිපති කන්ග් ගි-ජුන්ග් විසින් එම ප්රකාශය නුසුදුසු බව පවසමින් විරෝධය පළ කරනු ලැබීය.
ග්රාමීය සහ ධීවර ප්රජාව මුහුණ දෙන ජනගහන අවපාතය පිළිබඳ දැඩි අවධානයක් යොමු කිරීම ආණ්ඩුකාරවරයාගේ අරමුණ වන්නට ඇති බව සමහරු පවසතත්, ඔහු භාවිතා කළ වචන මාලාව දැඩි දෝෂදර්ශනයට ලක්ව ඇත.


