Local
ජනාධිපතිට රාජකීය ලණුවක් දීලා..
Published
4 years agoon
By
admin‘ජනාධිපතිවරණය පවත්වන තුරු වෙනත් කිසිම ඡන්දයක් පවත්වන්න නරකයි කියලා ජනාධිපතිතුමා හිතනවාලු. මේ කතාව ඇත්ත නම් කවුරු හරි ජනාධිපතිතුමාට රාජකීය ලණුවක් දීලා’ යයි පිවිතුරු හෙළ උරුමයේ නායක නීතිඥ උදය ගම්මන්පිල මහතා පවසයි.
ඒ මහතා මේ බව ප්රකාශ කර සිටියේ පිවිතුරු හෙළ උරුමය පක්ෂ මූලස්ථානයේ පැවැති මාධ්ය හමුවක් හා එක් වෙමිනි.
එහිදී පිවිතුරු හෙළ උරුමය නායකයා වැඩිදුරටත් මෙසේ අදහස් දැක්වීය.
මැතිවරණය කල් දැමීම ගැන නිලධාරින්ට බනින්න එපා
විපක්ෂයේ සමහර දේශපාලකයින් මැතිවරණය කල් දැමීම පිලිබඳ රජයේ මුද්රණාලයාධිපතිනියට දොස් කියනවා. තවත් සමහරු භාණ්ඩාගාර ලේකම්ට දොස් කියනවා. මැතිවරණ කොමිසමට බැන වදින අයත් ඉන්නවා. නමුත් රජයේ නිලධාරින්ට දොස් කියලා වැඩක් නෑ. ඒ අය චක්රලේඛ, ඇමති මණ්ඩල තීන්දු සහ ඇමතිවරයාගේ නියෝග අනුව කටයුතු කරන්න නීතියෙන් බැඳිලා ඉන්නවා. ණයට කිසිම භාණ්ඩයක් විකුණන්න එපා සේවාවක් සපයන්න එපා. එහෙම කලොත් තමන්ට පෞද්ගලිකව වග කියන්න වෙනවා කියලා චක්රලේඛයක් නිකුත් කලාම මුද්රණාලයාධිපතිනියට මුදල් ගන්නේ නැතිව ඡන්ද පත්රිකා නිකුත් කරන්න බෑ තමයි. ඡන්දය කල් දැමීම දේශපාලන තීන්දුවක්. අපි ඒකට අල්ලා ගන්න ඕනෑ ජනාධිපති ප්රමුඛ දේශපාලකයින් මිස බෙල්ලෙන් අල්ලා ගන්න ලෙහෙසි නිලධාරින් නොවේ.
නොවැම්බර් මස ජනපතිවරණයක් බෑ
සමහරු කියනවා ජනාධිපතිතුමා පුංචි ඡන්දය කල් දාන්නේ නොවැම්බර් 18දාට ජනපතිවරණය ප්රකාශයට පත් කිරීමේ බලාපොරොත්තුවෙන් කියලා. ඒක නිසා ජනපතිවරණයට කලින් ආණ්ඩුව වෙනත් ඡන්දයක් පවත්වලා ඒක අන්ත පරාජයකට පත් වුණාම ජනාධිපතිතුමාට නොවැම්බරයේ පවත්වන ජනාධිපතිවරණයට අයහපත් විධියට බලපාන්න පුළුවන්. ඒක නිසා ජනාධිපතිවරණය පවත්වන තුරු වෙනත් කිසිම ඡන්දයක් පවත්වන්න නරකයි කියලා ජනාධිපතිතුමා හිතනවාලු. මේ කතාව ඇත්ත නම් කවුරු හරි ජනාධිපතිතුමාට රාජකීය ලණුවක් දීලා.
ආණ්ඩුක්රම ව්යවස්ථාවේ 31(3අ)(අ) වගන්තිය අනුව ජනාධිපතිවරයා ස්වකීය ප්රථම ධූර කාලයේ වසර හතරක් සම්පූර්ණ කලාම නැවත වරක් තරග කරන්න ජනාධිපති බලාපොරොත්තු වන්නේ නම් මැතිවරණයක් පැවැත්විය හැකි බව පවසනවා. ඒ අනුව නම් ජනාධිපතිතුමාට නොවැම්බර් 18 මැතිවරණයක් ප්රකාශ කරන්න පුළුවන්. නමුත් ඒ වගන්තියේ තිබෙන (ඉ) අනුවගන්තිය කියනවා ජනතා ඡන්දෙයන් පත් නොවුණු අනුප්රාප්තික ජනාධිපතිට වසර හතරෙන් ජනාධිපතිවරණයක් ප්රකාශයට පත් කරන්න හිමිකමක් නෑ කියලා. ඒ කියන්නේ ව්යවස්ථාව හරි හැටි කියවපු නැති ගොඩ පෙරකදෝරුවෙක් තමයි නොවැම්බර් 18 ජනාධිපතිවරණය පවත්වන්න පුළුවන් කියා ජනාධිපතිට ලණුවක් දීලා තිබෙන්නේ.
මැතිවරණයට සල්ලි සොයා ගන්න විකල්ප ක්රම 4ක්
ආණ්ඩුව මැතිවරණය කල් දාන්න ඉදිරිපත් කරන බොරු හේතුව තමයි සල්ලි නෑ කියන එක. ඇත්ත හේතුව සල්ලි නැති එක නොවේ. ආණ්ඩුවට ඡන්ද නැති එක. නවතම සමීක්ෂණ වාර්තා කියන පරිදි ආණ්ඩුවේ ඡන්ද බැංකුව 10% දක්වා පහත වැටුණු එක. නැතිනම් මිලියන 9,000ක් බිලියන 9ක් සොයා ගන්න එක අමාරු වැඩක් නොවේ. ඒක අපට ලොකු ගණනක් වුණත් ආණ්ඩුවට පොඩි ගණනක්. දවසකට රුපියල් බිලියන 15ක් මේ ආණ්ඩුව වියදම් කරනවා. ඒකත් එක්ක බලන විට මේ අපි කතා කරන්නේ දවස් භාගයක වියදමක් ගැන.
ඇත්තටම සල්ලි නැතිනම් ආණ්ඩුවට අනුගමනය කරන්න පුළුවන් විකල්ප 4ක් තිබෙනවා.
1) දෛනික වියදමෙන් 1%ක් මැතිවරණ කොමිසමට ලබා දීම : ආණ්ඩුව එක දවසට රුපියල් බිලියන 15ක් වියදම් කරනවා. ඒකෙන් 1%ක් කියන්නේ මිලියන 150ක්. දිනපතා ආණ්ඩුවේ දෛනික වියදමෙන් 1%ක් මැතිවරණ කොමිසමට දුන්නොත් දින 60ක් යන විට ආණ්ඩුවේ ඇඟට පතට නොදැනීම මැතිවරණ වියදම කොමිසමට ලැබිලා විතරයි.
2) මුදල් අච්චු ගැසීම : ආණ්ඩුව පසුගිය දෙසැම්බර් මාසයේ එක දවසකට රුපියල් බිලියන 7 ගණනේ මුදල් අච්චු ගහලා තිබෙනවා. ඒ කියන්නේ එක දවසක අච්චු ගහන මුදල් මැතිවරණ කොමිසමට දුන්නොත් මැතිවරණය පැවැත්වීමට ඒකම ප්රමාණවත්.
රටේ මහ ප්රචණ්ඩත්වයක් ඇතිවෙලා මුළු රටම ආයෙ අක්රීය වෙලා අකර්මන්ය වීම ඉන් වලක්වා ගන්න පුළුවන්. මේ රටේ ජනතාවට ආර්ථික දුෂ්කරතා තියෙද්දි මොන මැතිවරණ ද කියලා ආණ්ඩුව අහනවා. ජනතාවට මේ ආර්ථික දුෂ්කරතා නිසා ආණ්ඩුවත් සමග තියෙන කේන්තිය හා තරහව පිට කරගන්න පුළුවන් සාමකාමීම ක්රමය මැතිවරණයකට ගිහිල්ල ජනතාව ආණ්ඩුවට විරුද්ධව කතිරය ගහන එක. ඒ අවස්ථාව අහිමි කිරීමෙන් ජනතාව ප්රචණ්ඩව ආණ්ඩුවට එරෙහිව තමන්ගේ කේන්තිය පිටකරන්න පුළුවන්. ඒ නිසා සල්ලි අච්චු ගහලා හරි මැතිවරණය පැවැත්වීම රටේ ශරීර සෞඛ්යයටත් විශේෂයෙන්ම ආණ්ඩුවේ ශරීර සෞඛ්යයටත් යහපතක් වෙනවා.
3) ජාත්යන්තර ආධාරයක් ලබා ගැනීම : ප්රජාතන්ත්රවාදය වෙනුවෙන් ආධාර ලබා දෙන රටවල් සහ සංවිධාන ගණනාවක් ලෝකයේ තිබෙනවා. රුපියල් බිලියන 9ක් කියන්නේ ඩොලර් මිලියන 24ක්. අපට පසුගිය දෙවසරේ විතරක් ඉන්දියාව ඩොලර් මිලියන 4,000ක් ණයට දීලා තිබෙනවා. ඒකත් එක්ක බලන විට මේක ඉතා සුළු මුදලක්. අපි මැතිවරණය පැවැත්වීමට ආධාරයක් ඉල්ලුවොත් මැතිවරණය පැවැත්වීම ප්රජාතන්ත්රවාදය රැක ගැනීම වගේම ඩොලර් ලැබෙන මාර්ගයක් බවට පත් කර ගන්නත් පුළුවන්.
4) මහජන ආධාර පැතීම : මැතිවරණයට වියදම් වන බිලියන 9 ඡන්දදායකයින් මිලියන 16න් බෙදුවොත් එක් ඡන්දදායකයෙකු දායක වන්න ඕනි රුපියල් 562යි. අද බොහෝ විට කෑම වේලකට ඊට වඩා යනවා. ආර්ථික දුෂ්කරතා මැද ඉන්න ජනතාව මත ඡන්දය පැවැත්වීමේ බරත් පටවන්න යනවා කියා දැන් චෝදනා කරන්න එපා. සෑම පුද්ගලයෙකුම මේකට දායක වෙන්න ඕනි නෑ. ඩොලර් බිලියනයකට වඩා වත්කම් තිබෙන ධනවතුන් සිටින රටක් මේක. ඒ නිසා ඇති හැකි අයට මැතිවරණය පවත්වන්න දායක වෙන්න ආණ්ඩුවට මැතිවරණ අරමුදලක් හදන්න පුළුවන්.
අපි මේ කිව්වේ විකල්ප 4යි. ආණ්ඩුවට සල්ලි සොයා ගන්න තව ඕනෑ තරම් විකල්ප ඇති. නැත්තේ මැතිවරණය පැවැත්වීමේ උවමනාව විතරයි.
මැතිවරණයට තරග කරන රජයේ නිලධාරින් නඩු මගට
රජයේ සේවකයෙක් මැතිවරණයට ඉදිරිපත් වෙන විට නාමයෝජනා දින සිට මැතිවරණ ප්රතිඵල නිකුත් කරන දින දක්වා වැටුප් රහිත නිවාඩු ලබා ගත යුතුයි. මේ අය වැටුප් රහිත නිවාඩු ලබා ගෙන අපේක්ෂකයින් බවට පත් වුණේ වැටුප් නැතිව ඉන්න වෙන්නේ උපරිම සති හතයි කියන බලාපොරොත්තුවෙන්. මොකද පලාත්පාලන මැතිවරණ නීතියට අනුව නාමයෝජනා දින සිට සති 7ක් ඇතුලත මැතිවරණය පැවැත්විය විය යුතුයි. වැටුප් ලැබිලාත් ජීවත් වෙන්න අමාරු යුගයක වැටුප් නැතිව මාස ගණනක් මේ නිලධාරින් ඉන්නේ කොහොමද?
Doctrine of Legitimate Expectation නැතිනම් සුජාත අපේක්ෂාවේ න්යාය අනුව ආණ්ඩුවේ යම් ස්ථාවරයක් තීන්දුවක් මත විශ්වාසය තබලා ජනතාව තීන්දුවක් ගත්තට පස්සේ ආණ්ඩුව එම ස්ථාවරය වෙනස් කිරීමෙන් ජනතාවට අලාභයක් වුනොත් එම අලාභය ආණ්ඩුවෙන් අයකරගැනීමට සුජාත වූ අයිතියක් තියෙනවා. ඒ අනුව මැතිවරණය සති හතකින් පවත්වාවි කියන බලාපොරොත්තුවෙන් මැතිවරණයට ඉදිරිපත් වුණු රජයේ සේවකයින්ට සති හත ඉක්ම ගිය වහාම තම වැටුප් ලබා ගැනීමට අයිතියක් තිබෙනවා. ඒ නිසා මැතිවරණය කල් දැමූ ආණ්ඩුව වහාම ඇමති මණ්ඩල තීන්දුවක් හරහා මැතිවරණ අපේක්ෂක රජයේ සේවකයින්ට වැටුප් ගෙවිය යුතුයි. නැතිනම් ඒ නිලධාරින් හරහා ආණ්ඩුවට එරෙහිව නඩු පැවරීමට අපි බලාපොරොත්තු වෙනවා.
No Presidential Election in this year
Reportedly, somebody has misled the President that he can hold the presidential election after 18th November 2023. He doesn’t want to hold any other election before the presidential election because the humiliating defeat at any other election would make a negative impact on the presidential election. That is why the President wants to postpone the LA election by one year. According to Article 31(3A)(a), the President can declare his intention to seek a second term after completion of 4 years of his first term. The presidential term completes 4 years on 18th November. However, sub-article (e) of the same article says that the President who was not elected by people is not entitled to exercise this right. Therefore, the President cannot hold the presidential election in this year as expected.
Contesting Government officers are entitled to their salaries
Government officers who contest the local authority election have obtained no pay leave according to the law. However, when they obtained the no pay leave, they expected the Government to hold the election within seven weeks from the conclusion of nominations as provided for in Local Authority Election Act. According to the Doctrine of Legitimate Expectation, when the people have taken a decision relying on government decisions, they will be entitled for compensation if the Government changes its decision. Hence, unless the Government decides to pay salaries of the contesting government officers immediately, we will file legal action against the Government.
ප්රශ්නය
මැතිවරණය පැවැත්වීම සම්බන්ධයෙන් පනවා ඇති නඩුවේ තීන්දුව කුමක් වේවිද ?
පිළිතුර
අද අධිකරණය ඉදිරියේ තියෙන්නේ නීති ප්රශ්නයක් නොවේ. අහවල් වගන්තිය වැරදි විදියට අර්ථකථනය කරලා ආණ්ඩුව මැතිවරණය කල් දමන්න යනවා වගේ නීති ප්රශ්නයක් නෙවෙයි. මෙය ආර්ථික ප්රශ්නයක්. ලංකාවේ හිටපු අගවිනිසුරු සරත් එන් සිල්වා මහතා ඉන්දීය අගවිනිසුරු වරියක් වූ භගවතී වැනි අය ජනතාවගේ පරමාධිපත්ය ජනතාවගේ මූලික අයිතිවාසිකම් රැක ගැනීම සඳහා නීතියේ නිම් වළලු පුළුල් කිරීමට කටයුතු කර තිබෙනවා. හුදු ආර්ථික ප්රශ්නයක් උසාවියට අයිති නැති ප්රශ්නයක් කියලා හිතන්නේ නැතුව ජනතාවගේ පරමාධිපත්ය සුරැකීම සඳහා ආණ්ඩුවට මේ මැතිවරණය සඳහා අරමුදල් සොයා ගැනීම සඳහා ඇති විකල්ප ඉදිරිපත් කරන මෙන් නියෝගයක් ලබා දීමට නීතිමය හැකියාවක් තියෙනවා යැයි මා විශ්වාස කරනවා. පොදු නීති පොතට පමණක් සීමා නොවී තමන්ගේ පරාසය පුළුල් කරමින් ජනතාවගේ පරමාධිපත්යය රැකීමට එය අහිමි නොකිරීමට කළ හැකි දේ අධිකරණය විසින් කරනු ඇතැයි අප බලාපොරොත්තු වෙනවා.
මෙම මාධ්ය හමුව සදහා පිවිතුරු හෙළ උරුමය මාධ්ය ලේකම් අරවින්ද අතුකෝරල, නැගෙනහිර කොළඹ ආසන සංවිධායක සරත් ඩයස් යන මහත්වරුන්ද සහභාගී විය.
-Media unit-
You may like
Local
අපි කියන මිලට වී නොගන්න මෝල් හිමියන් Black List කරනවා.. ලාල් කාන්ත
Published
4 months agoon
August 1, 2026By
admin
රජය නියම කර ඇති සහතික මිලට වී මිලදී ගැනීමට අපොහොසත් වන පෞද්ගලික මෝල් හිමියන් අසාදු ලේඛනගත කිරීමට පියවර ගන්නා බව කෘෂිකර්ම, පශු සම්පත්, ඉඩම් සහ වාරිමාර්ග අමාත්ය කේ.ඩී. ලාල් කාන්ත මහතා අවධාරණය කරයි.
අමාත්යවරයා මේ බව සඳහන් කළේ දෙහිඅත්තකණ්ඩිය මහවැලි සාලිකා ශාලාවේදී පැවැති ගොවි හමුවකට එක්වෙමිනි.
මෙහිදී වැඩිදුරටත් අදහස් දැක්වූ අමාත්යවරයා කියා සිටියේ, පෞද්ගලික අංශයට වී මිලදී ගැනීම සඳහා රජය මගින් සහනදායී ණය පහසුකම් ලබා දෙන්නේ රජයේ සහතික මිලට වී මිලදී ගැනීමේ කොන්දේසිය මත බවයි.
එසේ තිබියදී ඇතැම් මෝල් හිමියන් සහතික මිලට වඩා අඩු මිලට වී මිලදී ගන්නා බවට තොරතුරු වාර්තා වන බවත්, එවැනි පුද්ගලයන්ට ඉදිරියේදී රජය සමග ගනුදෙනු කිරීමට ඇති අවස්ථාවන් අහිමි කරන බවත් ඔහු පැවසීය.
රටේ කෘෂිකාර්මික ප්රතිපත්තියේ සිදුව ඇති වෙනස්කම් පිළිබඳව කරුණු දැක්වූ අමාත්යවරයා, මෙරට බඩඉරිඟු ගොවියා ආරක්ෂා කිරීම වෙනුවෙන් මේ වසරේ ආනයනය කිරීමට නියමිතව තිබූ බඩඉරිඟු මෙට්රික් ටොන් ලක්ෂ තුනක ප්රමාණය නතර කිරීමට රජය තීරණය කළ බව සඳහන් කළේය.
මේ හේතුවෙන් සත්ත්ව ආහාර නිෂ්පාදකයන් මුහුණ දී ඇති අමුද්රව්ය හිඟයට විසඳුමක් ලෙස, සහල් වෙනත් නිෂ්පාදන සඳහා අමුද්රව්යයක් ලෙස භාවිත කිරීමට පනවා තිබූ තහනම ඉවත් කළ බවද ඔහු අනාවරණය කළේය.
“සහල් වෙනත් නිෂ්පාදන සඳහා භාවිත කිරීම තහනම් කරමින් මීට පෙර නිකුත් කර තිබූ චක්රලේඛය අපි අහෝසි කළා. දැන් කිසිදු බාධාවකින් තොරව සත්ත්ව ආහාර හෝ වෙනත් නිෂ්පාදන සඳහා සහල් අමුද්රව්යයක් ලෙස භාවිත කරන්න පුළුවන්. එමගින් වී සඳහා පවතින ඉල්ලුම තවත් වැඩි වෙනවා,” යැයි අමාත්යවරයා පැවසීය.
එමෙන්ම පුරන් කුඹුරු අස්වැද්දීමේදී වී වගාවට පමණක් සීමා නොවී, බඩඉරිඟු වැනි අතිරේක බෝග වගා කිරීම කෙරෙහි අවධානය යොමු කළ යුතු බවත්, වී අලෙවි මණ්ඩලයේ ගබඩා ධාරිතාව ඉදිරි කන්නයේදී තවදුරටත් වැඩි කිරීමට සැලසුම් කර ඇති බවත් අමාත්ය ලාල් කාන්ත මහතා මෙහිදී වැඩිදුරටත් ප්රකාශ කළේය.
Local
ලෝක කුසලාන තරග බලන ක්රීඩා ලෝලීන්ට තහනම් භාණ්ඩ ලයිස්තුවක්..
Published
10 months agoon
February 7, 2026By
admin2026 T20 ලෝක කුසලාන ක්රිකට් තරගාවලිය වෙනුවෙන් කොළඹ නගරය කේන්ද්ර කරගනිමින් විශේෂ රථවාහන සැලැස්මක් සහ ආරක්ෂක වැඩපිළිවෙළක් ක්රියාත්මක කරන බව පොලිස් මාධ්ය කොට්ඨාසය නිවේදනය කරයි.
මෙම තරගාවලිය 2026 පෙබරවාරි මස 07 වන දින සිට මාර්තු 08 වන දින දක්වා පැවැත්වීමට නියමිත අතර, ශ්රී ලංකාවේ පැවැත්වෙන තරග කොළඹ ආර්. ප්රේමදාස ක්රීඩාංගනය සහ කුරුඳුවත්ත SSC ක්රීඩාංගනය කේන්ද්ර කරගනිමින් පැවැත්වේ. දේශීය හා විදේශීය ප්රේක්ෂකයින් විශාල පිරිසක් මෙම තරග නැරඹීමට පැමිණෙනු ඇතැයි අපේක්ෂා කරන බැවින්, තරග පැවැත්වෙන දිනයන්හිදී කොළඹ රථවාහන කොට්ඨාසය විසින් පහත පරිදි රථවාහන සැලැස්ම ක්රියාත්මක කරනු ලබයි.
ආර්. ප්රේමදාස ක්රීඩාංගනය ආශ්රිත රථවාහන සැලැස්ම
ආර්. ප්රේමදාස ක්රීඩාංගනයේ තරග පැවැත්වෙන දිනයන්හිදී වින්සන්ට් පෙරේරා මාවත (ග්රෑන්ඩ්පාස් පාර), බ්රීටෝ බබාපුල්ලේ පාලම හන්දිය, සෙබස්තියන් ඇළ පාර (මැල්වත්ත පාලම අසලින්), අඩි 100 පාර සහ සද්ධර්ම මාවත ඇතුළු මාර්ග කිහිපයක රථවාහන ගමනාගමනය අවස්ථානුකූලව සීමා කෙරෙනු ඇත.
විශේෂයෙන් පෙබරවාරි 08 (ශ්රී ලංකාව සහ අයර්ලන්තය), 15 (ඉන්දියාව සහ පාකිස්ථානය) සහ 19 (ශ්රී ලංකාව සහ සිම්බාබ්වේ) යන දිනවල පැවැත්වෙන තරග සඳහා විශේෂ රථවාහන සැලැස්මක් සහ ප්රවාහන සේවයක් ක්රියාත්මක වේ. මෙම දිනවල පැමිණෙන ප්රේක්ෂකයින් සඳහා පැරණි MOD රථගාල සහ පෝට්සිටි (Port City) රථගාලේ සිට ක්රීඩාංගනය දක්වා විශේෂ ප්රවාහන සේවයක් ක්රියාත්මක කිරීමට සැලසුම් කර ඇත.
එමෙන්ම පෙබරවාරි 11, 13, 21, 25 සහ 27 යන දිනවල පැවැත්වෙන තරග සඳහා ග්රෑන්ඩ්පාස් මැටිපාක්, සතොස, සෙබස්තියන් ඇළ, කෝවිල පාර සහ අඩි 100 පාර දෙපස රථගාල් පහසුකම් සපයා තිබේ.
SSC ක්රීඩාංගනය ආශ්රිත රථවාහන සැලැස්ම
SSC ක්රීඩාංගනයේ තරග පැවැත්වෙන පෙබරවාරි 07, 09, 10, 14 සහ 18 යන දිනවලදී රාජ්ය පරිපාලන හන්දිය, මෙට්ලන්ඩ් පෙදෙස සහ විද්යා මාවත ආශ්රිතව රථවාහන ගමනාගමනය සීමා කෙරේ.
මෙම තරග සඳහා පැමිණෙන රථවාහන ගාල් කිරීමට නිදහස් මාවත, පදනම් ආයතන මාවත, CR&FC, SSC ක්රීඩා සමාජ රථගාල, ක්රීඩා අමාත්යාංශයේ පරණ මැක්ඩොනල්ඩ් රථගාල, රූපවාහිනී රථගාල සහ BMICH පරිශ්රය වෙන් කර ඇත.
තරගාවලිය සඳහා පැමිණෙන ජනතාවගේ ආරක්ෂාව වෙනුවෙන් පොලිස් නිලධාරීන් 1500ක් සහ රථවාහන නිලධාරීන් 600ක් යොදවා ඇති බව පොලිසිය පවසයි. මීට අමතරව සිවිල් ඇඳුමින් සැරසුණු බුද්ධි අංශ නිලධාරීන් ද ආරක්ෂක කටයුතු සඳහා යොදවනු ලබයි.
විශාල ප්රමාණයේ ගමන් මලු, වීදුරු බෝතල්, ඩ්රෝන උපකරණ, මුවහත් පිහි, මත්ද්රව්ය සහ මත්පැන් ක්රීඩා භූමිය තුළට රැගෙන ඒම සපුරා තහනම් බව පොලිසිය මහජනතාවට දැඩිව අවධාරණය කරයි.



Local
ශ්රී ලංකාවෙන් තරුණියන් ආනයනය කර කොරියානුවන්ට විවාහ කර දිය යුතුයි.. කොරියා ආණ්ඩුකාර..
Published
10 months agoon
February 7, 2026By
admin
දකුණු කොරියාවේ ජින්ඩෝ ප්රාන්තයේ ආණ්ඩුකාර කිම් හී-සූ විසින් එරට පවතින ජනගහන පරිහානියට විසඳුමක් ලෙස ශ්රී ලංකාව සහ වියට්නාමය වැනි රටවලින් තරුණ කාන්තාවන් “ආනයනය” කළ යුතු බවට කළ මතභේදාත්මක ප්රකාශයක් සම්බන්ධයෙන් මේ වන විට දැඩි කතාබහක් සහ විවේචනයක් මතු වී තිබේ.
දකුණු ජොල්ලා ප්රාන්තයේ හේනම් සංස්කෘතික හා කලා මධ්යස්ථානයේ පැවති මහජන හමුවකදී ආණ්ඩුකාරවරයා මෙම ප්රකාශය සිදු කර ඇත. ක්වාන්ජු සහ දකුණු ජොල්ලා පරිපාලන ඒකක ඒකාබද්ධ කිරීමේ යෝජනාව සම්බන්ධයෙන් පැවති මෙම හමුවට දේශපාලන නායකයින්, විද්වතුන් සහ ප්රාදේශීය වැසියන් විශාල පිරිසක් සහභාගී වී සිටියහ.
සභාව අමතමින් කිම් හී-සූ පෙන්වා දුන්නේ දකුණු කොරියා ජනගහනය වඳවී යාමේ තර්ජනයට ලක්ව ඇති ප්රදේශ 89ක් හඳුනාගෙන ඇති බවත්, ඉන් සියයට 20ක්ම දකුණු ජොල්ලා ප්රාන්තයේ පිහිටා ඇති බවත්ය. 2000 වසරේ සිටම මෙම ජනගහන අර්බුදය පුරෝකථනය කර තිබුණද රජය හෝ විද්වතුන් ඒ සඳහා නිසි පියවර ගෙන නොමැති බවට ඔහු චෝදනා කළේය.
“අවසාන විසඳුම ලෙස හෝ අප ශ්රී ලංකාව හෝ වියට්නාමය වැනි රටවලින් තරුණ කාන්තාවන් ‘ආනයනය’ කර, ගම්බද ප්රදේශවල වෙසෙන අවිවාහක පුරුෂයන්ට විවාහ වීමට අවස්ථාව සලසා දිය යුතුයි. ඒ සඳහා විශේෂ ප්රතිපාදන සකස් කළ යුතුයි. මිනිසුන් නොමැති රටක කර්මාන්ත නගාසිටුවීමෙන් ඇති ඵලය කුමක්ද?”
මෙම ප්රකාශය යූ ටියුබ් (YouTube) නාලිකා ඔස්සේ සජීවීව විකාශය වූ අතර, එම අවස්ථාවේදීම පැනලිස්ට්වරයෙකු ලෙස සහභාගී වූ ක්වාන්ජු නගරාධිපති කන්ග් ගි-ජුන්ග් විසින් එම ප්රකාශය නුසුදුසු බව පවසමින් විරෝධය පළ කරනු ලැබීය.
ග්රාමීය සහ ධීවර ප්රජාව මුහුණ දෙන ජනගහන අවපාතය පිළිබඳ දැඩි අවධානයක් යොමු කිරීම ආණ්ඩුකාරවරයාගේ අරමුණ වන්නට ඇති බව සමහරු පවසතත්, ඔහු භාවිතා කළ වචන මාලාව දැඩි දෝෂදර්ශනයට ලක්ව ඇත.


